“Yaşıl gələcək naminə” aksiyası davam etdirilir

Ümummilli Lider Heydər Əliyevin Anım günü münasibətilə Dini Qurumlarla İş üzrə Dövlət Komitəsinin təşkilatçılığı ilə keçirilən “Yaşıl gələcək naminə” aksiya dekabrın 4-də Bakı və Sumqayıt şəhərlərində, həmçinin Abşeron, Xızı, İmişli, Beyləqan, Saatlı və Sabirabad rayonlarında davam etdirilib.

Tədbirdə adıçəkilən bölgələrin dini konfessiya nümayəndələri, gəncləri və ictimaiyyət fəalları bir araya gələrək ətraf mühitin mühafizəsinin əhəmiyyətini bir daha nümayiş etdiriblər. Aksiya çərçivəsində Bakı şəhərində yerləşən 30-dan artıq ibadət evində təmizlik və abadlıq işləri aparılıb, 10 məscidin həyətyanı sahəsində isə ağac tingləri əkilib. Eyni zamanda, Sumqayıt şəhərində, həmçinin Xızı və Abşeron rayonlarında 30 məsciddə təmizlik və abadlıq işləri görülüb, 5 ibadət evinin həyətyanı sahəsi yaşıllıqlarla zənginləşdirilib. İmişli, Beyləqan, Saatlı və Sabirabad rayonlarında isə 35 ibadət evində təmizlik və abadlıq işləri aparılıb, 5 məsciddə isə ağac tingləri əkilib.

Azərbaycanın bütün bölgələrini əhatə etməklə dekabrın 10-dək keçiriləcək aksiyanın məqsədi müxtəlif konfessiyalar arasında həmrəyliyin, ictimai birlik ruhunun daha da gücləndirilməsinə töhfə vermək, dini icma üzvlərinin və ictimaiyyətin diqqətini ətraf mühitin sağlamlaşdırılmasına, yaşıllıqların artırılmasına yönəltməkdir.